काठमाडौं । भारतमा डाक्टरको बलात्कारपछि हत्या भएको घटनापछि निरन्तर प्रदर्शन भइरहेको छ । बलात्कारपछि हत्या भएकी डाक्टरको न्यायका लागि नेपालमा समेत विभिन्न प्रदर्शन भइरहेका छन् । निकै क्रुर ढंगमा भएको उक्त बलात्कारपछि हत्या भएको घटनाले संसारभरका महिलालाई झस्काएको छ ।
पश्चिम बंगालको कोलकातास्थित आरजी कर मेडिकल कलेज अस्पतालमा पोस्ट ग्र्याजुयट गरिरहेकी प्रशिक्षार्थी एक डाक्टर अगस्ट ९ मा अस्पतालकै सेमिनार हलमा मृत भेटिएकी थिइन् । परीक्षण गर्दा उनीमाथि बलात्कार र त्यसपछि हत्या भएको खुलेको थियो । घटनापश्चात सेवा बन्द गरेर स्वास्थ्यकर्मीहरू आन्दोलनमा उत्रिएका थिए ।
प्रदर्शनमा भारतीय मेडिकल एसोशिएसन, नागरिक समाज र विद्यार्थीहरूले ऐक्यवद्धता जनाएका छन् । भारतको प्रहरीले घटनामा संलग्नलाई पक्राउ गरिसकेको छ तर प्रदर्शन मत्थर भएको छैन । ती डाक्टरमाथि सामूहिक बलात्कार भएको तर प्रहरीले एकजनालाई देखाएर अन्यलाई उन्मुक्ति दिन खोजिएको भन्दै प्रदर्शनकारीहरूले अभियुक्त पक्राउ परिसक्दा पनि प्रदर्शन जारी राखेको भारतीय समाचार संस्थाहरूले जनाएका छन् ।
बलात्कारपछि अभियुक्तले घाँटी थिचेर डाक्टरको हत्या गरेको पोस्टमर्टम रिपोर्टमा देखिएको छ । अस्पतालमै जघन्य अपराध भएपछि अगष्ट १२ मा अस्पतालका प्रिन्सिपल प्राध्यापक डा. सन्दीप गोशले पदबाट राजीनामा दिएका थिए ।
