काठमाडौं । केही दिनअघि रास्वपाकी सांसद सोविता गौतमले पोखरामा जारी आन्दोलनका क्रममा भाषण गर्दै भनिन्, ‘एउटा व्यक्ति रवि लामिछाने जेल जानु र नजानुले खासै ठूलो फरक पार्दैैन, तर यो सरकारको तानाशाही प्रवृत्तिका विरुद्ध लड्नै पर्छ साथीहरु !’ उनको भनाइले धेरै ताली पायो । कतिपयले सोवितालाई स्वर्गीय नेता मदन भण्डारीसँग तुलना गर्नसम्म भ्याए । त्यसै भाषणको बीचमा उनले प्रधानमन्त्री र नेपाल सरकारलाई ‘मुर्दावाद’ भनिन् । जसको चौतर्फी आलोचना भयो ।
यसरी सोविताको चर्चा नसेलाउँदै आइतबार रास्वपा उपसभापति डीपी अर्यालले गरेको अर्को भाषणको अंश चर्चामा छ । उनले भनेका छन्, ‘रवि लामिछाने बाँचुन्जेलसम्म रास्वपाको सभापति रवि लामिछाने नै हो ।’ कतिपय रविभक्तले अर्यालको उक्त भाषणको पनि प्रशंसा गरेका छन् । ‘गुड लक रवि दाइ’ भन्दै सामाजिक सञ्जाल रंग्याएका छन् । यसैबीच सोविता र डिपीको भाषणको तुलना पनि हुन थालेको छ ।
तर प्रष्ट छ कि, सोविताको उक्त भाषणभन्दा डिपीको भाषणको अर्थ निकै खतरनाक छ । आन्दोलनरत पक्षले सत्तालाई ‘मुर्दावाद’ भन्नु स्वभाविकै मान्न सकिएला । तर एउटा व्यक्तिलाई देवत्वकरण गरेर आजीवन पार्टी सभापति स्वीकार्न तयार हुनु भनेको ‘दास मानसिकताको पराकाष्ठा’ हो । अझ, ‘जेल परे पनि हाम्रो पार्टी सभापति उहाँनै हो’ भन्नुले त डिपीको निरीहतासँगै नीच सोचलाई पुष्टि गर्छ । यहाँ बुझ्नपर्ने कुरा यो छ कि, रास्वपा सभापति लामिछाने कुनै राजनीतिक मुद्दामा पक्राउ परेका होइनन् ।
कुनै राजनीतिक आन्दोलनका क्रममा पक्राउ परेका पनि होइनन् । रास्वपाले जबरजस्त ‘प्रतिशोध’को लेप लगाएर रवि पक्राउलाई राजनीतिक रंग दिन खोजे पनि सचेत नागरिकले पत्याउनेवाला छैनन् । किनकि, रवि सहकारी ठगीमा पक्राउ परेका हुन् र उनीमाथि संगठित अपराधसँगै सम्पत्ति शुद्धीकरणको विषयमा अनुसन्धान भइरहेको छ ।
रवि मात्रै होइनन्, यहीं मुद्दामा चेक डिपोजिट गर्ने रोशनी गुरुङसँगै अरु थुप्रै हिरासतमा छन् । यहाँ अरुको बारे कसैलाई चासो, चिन्ता छैन । तर रविको मामलामा जुन रोइलो भइरहेको छ, त्यो राजनीतिक होइन । यसर्थ डिपीको भनाइको अर्थ हुन्छ– रवि अदालतबाट दोषी प्रमाणित भएर जेल गए भने पनि सभापति उनी हुन् । अर्थात्, जस्तै अपराध गरे पनि रास्वपाको सभापति रवि लामिछानेबाहेक अर्को व्यक्ति हुनै सक्दैन ।
कुनै राजनीतिक मुद्दामा पक्राउ परेका नेताले जेलभित्रै बसेर पार्टी र आन्दोलन चलाएको नजीर नभएको होइन । तर, ठगी मुद्दामा दोषी ठहर भए पनि राविलाई सभापति मान्ने भन्ने अर्यालको भनाइ निकै तल्लो स्तरको हो । विगतमा ‘नो नट अगेन’ भन्ने अभियान चलाएर र प्रचण्ड–ओलीले नेतृत्व कब्जा गरेको भनेर ओलचना गरेकै कारण लोकप्रियता कमाएको पार्टीका नेताले यो स्तरको अभिव्यक्ति दिनु लज्जाजनक विषय हो ।
हुनत, पार्टीभित्र कार्यवाहक सभापतिको विषयमा बढेको किचलोलाई मत्थर पार्न पनि डिपीले यस्तो भनेका हुनसक्छन् । तर, कारण जे–जे भए पनि डिपी जस्तो ‘दास मानसिकता’ले न देशलाई भलो हुन्छ, न रास्वपालाई नै ।
