काठमाडौं । पेट्रोल र डिजेलबाट चल्ने परम्परागत गाडीभन्दा विद्युतीय सवारीसाधन बढी टिकाउ र भरपर्दो हुने तथ्य सार्वजनिक भएको छ । बर्मिङ्घम विश्वविद्यालयका अनुसन्धानकर्ताले गरेको एक अध्ययनले पेट्रोल वा डिजेलबाट चल्ने कारभन्दा विद्युतीय कार बढी भरपर्दो भएको निष्कर्ष निकालेको हो ।
अनुसन्धानकर्ताले बेलायतका सडकमा गुड्ने लगभग ३० करोड गाडीको ‘स्वास्थ्य’ परीक्षणको तथ्याङ्कलाई विश्लेषण गरेका थिए । सन् २००५ देखि २०२२ सम्मको यातायात मन्त्रालय परीक्षणको तथ्याङ्क प्रयोग गरेर गाडीको आयु र विभिन्न पावरट्रेनको टिकाउ दरको विस्तृत विश्लेषण गरिएको थियो । यस तथ्याङ्कलाई विश्लेषण गर्दा सुरुवाती चरणका विद्युतीय गाडी पेट्रोल वा डिजेल गाडीभन्दा कम भरपर्दो र कम टिक्ने देखाएको छ । तर, पछिल्लो समयमा ईभीमा भएको तीव्र विकासले गर्दा नयाँ विद्युतीय गाडीको आयु आईसीई गाडीको जत्तिकै भएको पाइएको रिपोर्टमा उल्लेख छ ।
नेचर इनजर्कीमा प्रकाशित उक्त अध्ययनले विद्युतीय गाडीहरू औसतमा १८.४ वर्षसम्म टिक्ने र एक लाख २४ हजार माइलसम्म गुड्न सक्ने देखाएको छ । यो तथ्याङ्क आईसीई गाडी औसत आयु भन्दा धेरै हो । विद्युतीय गाडीको विकासका लागि भएको ठूलो लगानीका कारण पछिल्ला वर्षहरूमा यसको विश्वसनीयतामा उल्लेख्य सुधार आएको छ ।
यस अध्ययनले विद्युतीय गाडीका ब्याट्री कम्तीमा २० वर्ष टिक्ने र सोचेभन्दा कम क्षमता गुमाउने देखाएको छ । यस अध्ययनमा बर्मिङ्घम विश्वविद्यालय, लन्डन स्कूल अफ इकोनोमिक्स एण्ड पोलिटिकल साइन्स (एलएसई), युनिभर्सिटी अफ क्यालिफोर्निया सान डिएगो र स्विट्जरल्याण्डको युनिभर्सिटी अफ बर्नका अनुसन्धानकर्ता संलग्न थिए । उनीहरूले टेस्ला विद्युतीय गाडीको आयुको हिसाबले अग्रस्थानमा रहेको पत्ता लगाएका छन् । आईसीई गाडीमा भने अडी र स्कोडा उत्कृष्ट रहेको पाइएको छ ।
