काठमाडाैं । १६ वर्षमुनिका गायन प्रतिभाहरुको प्रतिस्र्पात्मक रियालिटी टेलिभिजन शो जुनियर सिङ्गिङ स्टारको दोस्रो अडिशन सिन्धुपाल्चोकको सदरमुकाम चौतारामा सम्पन्न भएको छ।
देशभरिको दश वटा अडिसनबाट टेलिभिजन राउन्डका लागि उत्कृष्ट १०० जना प्रतिस्पर्धी छान्ने योजना अनुरुप काभ्रे र सिन्धुपाल्चोकलाई लक्षित गरेर चौतारास्थित कृष्ण रत्न गङ्गा उच्च माविमा भाद्र २९ गते अडिसन सम्पन्न गरिएको कार्यक्रम प्रस्तोता घनश्याम तिमल्सिना एन्टिनाले बताएका छन् ।
आर्या मिडिया हाउसले संचालन गरेको उक्त रियालिटी शो ग्लोबल एच डि टेलिभिजनबाट प्रसारण हुनेछ भने कार्यक्रमलाई कपिल कार्कीले निर्देशन गरेका हुन् ।
गत साउन २६ गते काठमाडौमा पहिलो अडिसन सम्पन्न गरिसकेको यो कार्यक्रममा गायक तथा संगीतकार डिजराज पौडेल, गायिका सरु गौतम, गायक कर्णराज गिरी, डेबिट शंकर निर्णायकको भूमिकामा रहेका छन।
नियुक्ति शेर्पा र घनश्याम तिमल्सिना एन्टिना होस्ट रहेको यो रियालिटी शोमा सिन्धुपाल्चोकका तीन दर्जन विद्यालयबाट १२० जना विद्यार्थी सहभागी भएको कार्यक्रम संचालक तिमल्सिनाले बताए । सिन्धुपाल्चोक अडिशनबाट टप सय राउन्डको लागि २२ जना विद्यार्थी छनोट भएका छन् ।
जुनियर सिङ्गिङ स्टार हुन सफलले ५ लाख, सेकेन्डले २ लाख पचास हजार र तेस्रोले १ लाख रुपैयाँको पुरुस्कार प्राप्त गर्ने आयोजक आर्या मिडिया हाउसले जनाएको छ ।
